Kang Oni : Pandu

Pandu

IRUNG Kuwu Uceng ngadadak kembung. Liangna kawas ngabeukahan. Sidik, seubeuh ku pamuji. Desa Jeruk Purut oge saheng. Bubuhan desana dek komaraan deui. Para inohong ti puseur kota pamarentahan milu reueus, alatan Desa Jeruk Purut mampuh ngahudang deui kagiatan Pandu. Organisasi siswa di sakolaan, nu geus kamomorekeun.

Antukna, Pandu badis gering nangtung ngalanglayung. Dimana-mana siga nu kasarung. Teu manggih lawang keur menyat deui. Puguh Desa Jeruk Purut jadi catur pamujian. Pandu bisa nguliat deui, mapag acara rongkah di Lapang Gugunungan, nu perenahna beh kiduleun puseur desa. Kabeh warga desa daria. Dek ngadeugdeug acara gede, nu dikembangan ku tulisan “Pandu Jati Diri Warga Jeruk Purut”.

Kabayan marahmay. Rut-ret ka sakuriling Lapang Gugunungan, nu aya di Kampung Terahintan. Sakapeung tatanggahan bari dungdak-dengdek. Macaan tulisan dina spanduk, nu sakitu barakbakna. Ret deui ka lebah balandongan, nu keur diwangun ku warga. Kabayan unggut-unggutan, bari lujag-lejeg.

Sejen deui jeung Lamsijan. Manehna mah bobolokot kesang. Mantuan masangkeun umbul-umbul di saparat jalan, liliwateun ka lapang. ‘Kang Oni ge teu cicingeun. Subrat-sibret menerkeun sound-system, sangkan sora nu pidato tina speaker, ulah aya cawadeunana. Kakalacatan we kana panggung.
“Kabayan…, ari ilaing naon gawe, euy?” Lamsijan ngagero, bari nyusutan kesang nu ngoprot. Kabayan nyirintil. Gancang napelkeun curuk kana biwirna.

“Ari ngomong teh ulah jangji ngangah atuh! Era ku batur… Sarua uing ge cape, euy.. !“ Kabayan nompokeun sorana kana ceuli Lamsijan.
“Geuning ilaing mah teu kaciri ngesang..!” Lamsijan ngareretan beungeut Kabayan. Terus, leguk-leguk nginum cai kalapa.

“Kesang mah lain ukuran gawe, Jan! Tuh tinggali Ki Ulis di kantor desa, nu ngagutrut beurang peuting nyusun laporan, teu nepi ka ngesang. Pek deui para wartawan ngadukduk ngetik dina komputer, kacirina mah kulimis we karasep. Padahal sarua carapena mah.. Teu kudu cipruk kesang kawas ilaing!” Kabayan bangun namplokkeun kakeuheul. Lamsijan jongjon ngopi. Cacamuilan.  
“Heueuh eta mah puguh propesina! Ari ilaing naon?” ceuk Lamsijan deui.
“Apan uing mah bagean evaluasi! Ti baheula oge kapake, jadi relawan mandor. Gawe enteng, tampa honor..” Kabayan seuri koneng.
“Lah…, ukur ngamandoran nu digarawe, bari ngaheroan ududna!” omong Lamsijan bari samutut. Kabayan teu nembalan. Kedewek miluan ngopi. Ret ka lebah ‘Kang Oni, nu norojol dek milu nyambungan.
“Kumaha hasil evaluasi ilaing teh, euy?” ceuk Kang Oni ka Kabayan. Nu ditanya rikat ngacungkeun jempolna. Bubuhan biwirna hese engab. Pinuh ku kadaharan. ‘Kang Oni seuri, ninggali Kabayan wangun ileg-ilegan.

“’Kang, ari Kuwu Uceng ka mana? Ti mimiti prung tatahar nepi ka kiwari.., can kungsi ngulampreng ka dieu? Nu cakah-cikih teh bet ‘Kang Amang Jupri saparakanca. Lain nu seungitna mah ngaran Kuwu Uceng.?” ceuk Kabayan.

“Puguh milik Kuwu Uceng mah! Boga Kang Amang Jupri daek dipancenan jadi pingpinan Pandu di Desa Jeruk Purut. Kawantu deuih, micinta pisan kana kagiatan Pandu. Bubuhan ‘Kang Amang Jupri mah Pandu pituin, euy..” omong Kang Oni.mani reueus.
“Ari Kuwu Uceng…?” tempas Lamsijan.

“Teuing…! Uing mah nyaho soteh ka ‘Kang Amang Jupri. Ti jaman sakola keneh, manehna mah icikibung dina Pandu teh. Sieup pisan jadi pupuhu Pandu di desa urang…” walon ‘Kang Oni.
“Akang kungsi jadi Pandu..?” ceuk Lamsijan.
“Puguh we atuh, apan baheula mah diwajibkeun! Ngan uing teu junun! Karunya ku kolot, teu bisa nyumponan waragadna. Hayang boga kacu wae, dibelaan teu meuli beas, euy..” ‘Kang Oni nyawang pangalamanana.

“Haaaar...! Sugan teh uing wungkul, ‘Kang! Uing mah kungsi hayang pisan  laksana make saragam Pandu. Orokaya.., teu kabedag” tempas Kabayan.

“Teu ngabibisani, euy! Baheula kabita jadi Pandu teh, pedah gagah. Make baret, baju saragam jeung atribut Pandu. Horeng lain keur gagayaan, tapi rea pangajaran elmu Pandu, keur pibekeleun hirup anggotana. Bisa jadi pamingpin organisasi, bisa jadi pajabat pamarentahan sagala” ceuk ‘Kang Oni tandes.
“Ah, asa teu nyambung bet bisa jadi pamingpin! Lain Pandu mah ngan ukur diajar baris. Diajar nyanyi babarengan. Mun teu kitu, kemping di gunung.” Lamsijan ngahuleng.

“Eta mah paradigma heubeul, euy! Nu matak ‘Kang Amang Jupri gancang singkil. Dek nanjeurkeun deui organisasi Pandu, nu saujratna. Waragadna oge moal ngabeuratkeun ka rahayat. Kabeh warga rek dikeprak, sangkan ngarojong kana komara Pandu nu geus nyirorot” tembal ‘Kang Oni norolang. Lamsijan ngabandungan saregep naker. Sabalikna, Kabayan kalahka sura-seuri. 
“Naha ilaing bet seuri, Kabayan?” Kang Oni heran.

“Moal salah uing mah! Eta riwayat ‘Kang Amang Jupri, nu baris dipedar dina buku “Sajeroeun Dada Pandu”…Betul?” Kabayan seuseurian.

“Geuning ilaing nyaho? Geus maca bukuna..?” Kang Oni panasaran.
“Apan uing teh tim evaluasi, ‘Kang! Nyaho kana kabeh konsep acara. Eta buku biografi ‘Kang Amang Jupri teh dek lounching dina momentum ‘Pandu Jati Diri Warga Jeruk Purut’!” omong Kabayan pegeskeun.
“Heueuh nya ilaing teh tim evaluasi…!” Kang Oni ngabelehem.   

 “Taaah Jan, uing mah ngabejaan we! Desa Jeruk Purut teh dek nyikalan deui hudangna Pandu. Desa urang minangka desa percontohan keur sakuliah nagri.. Hebat, nya, euy?” Kabayan milu legeg. Lamsjian olohok bari kekecrek.

“Paingan atuh ‘Kang Adi Ucup pamingpin Pandu ti puseur dayeuh, rek ngahadiran acarana! Bener we hajat gede ieu mah. Aya buku ‘Sajeroeun Dada … Iteung’ deuih….” Lamsijan teu kebat.
“Huss.., lalawora! ‘Sajeroeun Dada Pandu’.. Si ‘Iteung” mah teu pipilueun!” tempas Kabayan. Lamsijan nyerengeh.

“Aeh enya, naha nyebut dada bet los ka Iteung! Sabarahaeun waragadna eta acara teh, euy?” omong Lamsijan.

“Tong diwaro, Kang! Tuman..” Kabayan ngareret ka Kang Oni. Maranehna  tinglaleos. Arindit. Ngantep Lamsijan olohok ***