Huntu Palsu

Huntu Palsu

HARITA Nini Imih, tatangga Lamsijan, memang kakara dipangmeulikeun huntu palsu ku incuna. Kulantaran teu biasa, biwirna kagokeun keneh. Hayoh we kunyam-kunyem jiga nu keur barang capek. Si Itok tea atuh kabitaan. Teu kaur nempo nu guyam-gayem, langsung nyelengkeung ka indungna. "Ema hayang dahareum anu keur gayem ku Nini Imih!" ceuk Itok bari nyelengkeun ti buruan. Nyi Iting tibuburanjat muru ka buruan. Ma'lum si Itok tea lamun teu buru-buru digugu sok terus ngoceak. "Embi, nuju nuang naon eta teh?" ceuk Nyi Iting ka Nini Imih. "Ah..., teu keur dahar nanaon. Ieu mah kunyam-kunyem teh pedah kagok make huntu palsu pamere icu!" tembal Nini Imih. "Oh..., manawi teh!" ceuk Nyi Iting. "Ujang... kasep, Nini Imih mah teu dahar nanaon. Keur nyobaan huntu palsu!" beja Nyi Iting ka si Itok. "Keun bae Ma... lah huntu palsu ge da rangu meureun!" tembal si Itok merekedeweng. Nyi Iting garo-garo teu ateul. (Budhi JN)***