Gusti Alloh

Gusti Alloh

TEUING kumaha digarawena ari aparat Desa Jeruk Purut. Ceuk beja mah, nepi ka danget ieu loba keneh program anu teu cumpon, utamana di widang pangajaran. Malah, program anu dua taun ka tukang acan oge diparigawe. Teu aneh lamun Sekdes Jeruk Purut, Kang Ali, hayoh gegeleneng. "Cik, kumaha sual pangwangunan sakola teh masalahna. Naha bet can rengse wae?" ceuk Kang Ali waktu mingpin rapat di bale desa. Anu ditanya, Kang Olon, ukur 'ak... 'ik...'uk. "Euh.... euh... euh. Anu Kang Sekdes...," walon Kang Olon teu kebat, bari beungeutna reup geuneuk ray pias. Sabab teu boga alesan anu eces keur nyingcet tina pasualan. "Kang Olon mah loba wae alesan. Ieuh da moal aya pagawean anu rengse ukur ku nepikeun alesan. Kudu kumaha deui atuh ieu teh. Maenya ari kudu dilaporkeun ka Gusti Alloh mah!" ceuk Kang Ali bari molotot. Kang Olon ukur tungkul. (Budhi JN)***