Pulsa

Pulsa

Bi Iwok teh pembantu di imah Dadang. Geus kolot jeung teu kungsi sakola. Hiji waktu manehna dititah meuli pulsa elektrik ka konter di peuntaseun jalan. "Bi, punten tulungan, pangmeserkeun pulsa elektrik nu 20 rebu. Tah ieu nomorna jeung artosna," ceuk Dadan bari mikeun duit jeung keretas nu aya tulisan nomor HPna. Bi Iwok langsung indit. Tapi geus ampir tilu jam Bi Iwok teu balik deui, padahal pulsa mah ti tatadi ge geus asup. "Kamana atuh Bi Iwok teh, pikahariwangeun bae?" ceuk Dadan ka pamajikanana. Kapaksa Dadan indit ka konter nyusulan Bi Iwok, hariwang bisi kumaha onam. Barang srog teh, kasampak Bi Iwok keur cingogo we handapeun etalase. "Ari bibi naha bet teras cicing handapeun etalase? tanya Dadan. "Apan nuju nungguan pulsa Cep, tukang pulsana teu acan masihkeun wae ka Bibi," jawab Bi Iwok. Dadan gogodeg. "Tos we mulih yu, keun pulsa mah sina asak heula. Nuju digoreng keneh," ceuk Dadan bari nahan piseurieun. (ES)***